Mbunge wa Jimbo la Nyasa, John John Nchimbi, amehoji hali ya baadhi ya vituo vya afya kukamilika kujengwa lakini kushindwa kuanza kutoa huduma ipasavyo kutokana na ukosefu wa vifaa tiba. Akichangia bungeni, Nchimbi amesema mara nyingi bajeti inayotengwa hulenga ujenzi wa miundombinu pekee bila kuzingatia ununuzi wa vifaa tiba vinavyohitajika ili vituo hivyo viweze kufanya kazi mara moja baada ya kukamilika. Ameiomba Serikali kuhakikisha bajeti za ujenzi wa vituo vya afya zinaambatana na bajeti ya vifaa tiba ili kufanikisha lengo la kuboresha huduma za afya kwa wananchi. Akijibu hoja hiyo, Naibu Waziri wa Ofisi ya Waziri Mkuu TAMISEMI, Jafari Seif, amesema Serikali inaendelea kuimarisha upatikanaji wa vifaa tiba katika vituo vya kutolea huduma za afya nchini. Ameeleza kuwa Serikali imeendelea kushirikiana na Bohari ya Dawa (MSD) katika kuhakikisha vifaa tiba vinapatikana kwa wakati huku ikichukua hatua za kupunguza gharama za ununuzi na usambazaji wa vifaa hivyo ili kuimarisha utoaji wa huduma za afya kwa wananchi.