Meli ya kimataifa ya kusafirisha mafuta, MT CLEAROCEAN MIRACLE, imewasili na kushusha moja kwa moja shehena kubwa ya Mafuta katika Kisiwa cha Unguja, hatua inayotajwa kuwa mafanikio makubwa katika kuimarisha upatikanaji wa nishati pamoja na usalama wa akiba ya Mafuta Zanzibar. Meli hiyo imewasili ikiwa na jumla ya lita 36,271,100 za Mafuta ya aina mbalimbali, zikiwemo lita 14,702,045 za Petroli, lita 11,476,392 za Dizeli na lita 10,092,663 za Mafuta ya Ndege. Akizungumza baada ya kuipokea meli hiyo, Katibu Mkuu wa Wizara ya Maji, Nishati na Madini, Joseph Kilangi amesema hatua ya Meli hiyo kushusha mafuta moja kwa moja katika Kisiwa cha Unguja inaonesha kuendelea kuimarika kwa miundombinu ya uhifadhi na upokeaji wa Mafuta Zanzibar. Amesema maendeleo hayo yatachangia kuongeza uhakika wa upatikanaji wa Mafuta, kuimarisha huduma za Nishati na kusaidia ukuaji wa shughuli za kiuchumi Visiwani. Wadau wa Sekta ya Nishati wameeleza kuwa ujio wa MT CLEAROCEAN MIRACLE ni ishara ya kuongezeka kwa imani ya wawekezaji na Kampuni za Kimataifa katika huduma za Bandari za Zanzibar, kutokana na maboresho yanayoendelea kufanyika katika miundombinu ya usafirishaji na uhifadhi wa Mafuta. Aidha, ushushaji wa Mafuta moja kwa moja katika Unguja unatajwa kuwa na manufaa makubwa ikiwemo kupunguza gharama za usafirishaji, kuongeza ufanisi wa ugavi wa mafuta na kuimarisha usalama wa Nishati kwa Zanzibar. ✍️🏽 @almecky_tz Sikiliza CROWN FM kupitia 92.1 Mhz, Radio Box & Radio Garden tafuta CROWN FM. Tutazame Live kupitia YOUTUBE channel yetu CROWN MEDIA na CROWN TV kwenye Kisimbuzi cha Azam (DISH) ni chaneli namba 415. #CrownMedia #HapaNiNyumbani #TupoMwakaWaMbele