UJUMBE WANGU KWA TAIFA Salaam. Kwanza, nitoe pole za dhati kwa wote waliofikwa na misiba, majeraha au hasara kutokana na vurugu zilizotokea. Kurudishiana maumivu si utu, wala si msingi wa taifa letu. Tofauti za kisiasa hazitufanyi tuache kuwa jamii moja kwani kabla ya itikadi, sisi ni binadamu na ni Watanzania. Mimi ni mhanga wa fujo hizo, Na Ofisi yangu imechomwa na mali zangu zimeteketea. Wapo wanaoonekana kufurahia, wakidai “nilistahili” kwa sababu ya msimamo wangu wa kisiasa. Lakini ukweli ni huu: sijawahi kumtukana mtu, sijawahi kumdhuru mtu nimekuwa tu muumini wa siasa ninayoiamini kupitia Chama Changu CCM. Lakini je, wale wasio na chama walioumizwa je? Nani anawatetea? Hili linaonesha wazi kuwa fujo hazitofautishi bali ni uharibifu usio na mantiki. Kwa hivyo wakati huu si muda wa kutafutana mchawi, wala kushindana kutupiana lawama. Ni wakati wa busara. Nawabariki na kuwasamehe wote waliohusika katika uharibifu wa biashara yangu huku wakiwa wamedhamiria kunirudisha nyuma. Muhimu ni kwamba Mwenyenzi Mungu ameendelea kuniruzuku UHAI basi ninaamini MALI zinaweza kurejeshwa kwa juhudi na kupambana pasipo KUKATA TAMAA lakini pumzi ya uhai haina mbadala. Alhamdulillah!! Naiombea nchi yangu. Namuombea Rais wangu, Mama Samia, pamoja na Serikali yake katika kuendeleza Awamu ya Sita katika kipindi chake cha pili. Kwani ninamani kuwa huu ni wakati wa kuimarisha Umoja na Upendo kwa taifa letu ni muhimu sana tukawaunga mkono Viongozi wetu. Na mimi sitarudi nyuma katu, Nitaendelea kuamini, kutetea na kusimama na imani safi ya chama changu CCM, licha ya majaribu, vitisho na hasara niliyopata. Ninashauri tusimamie katika nguzo ya hekima, maridhiano, uvumilivu na utatuzi wa hoja bila fujo. Kwa walionijulia hali baada ya Kuzushiwa Kifo: Poleni kwa namna mlivyojisikia baada ya habari zile. Asanteni kwa kujali. Mali zilizopotea ni hasara kubwa sana na nimeumia, ila haziwezi kuwa na thamani kuliko uzima huu Mungu alionipa, Alhamdullilah. Tuchague Amani. Tuchague Umoja. Tuchague Busara. Mungu Ibariki Tanzania 🇹🇿